8 yaşlı qız atasını silahlı soyğunçudan xilas etdi - VİDEO

ABŞ-də 8 yaşlı qız atasını quldurların əlindən xilas edib.

Ölkə.Az xarici KİV-ə istinadla xəbər verir ki, hadisə Minnesota ştatının Maplewood şəhərindəki “Big Discount Liquors” mağazasında baş verib.

Belə ki, şənbə günü axşam saat 21:30 radələrində mağazanın sahibi Leo obyekti bağlamağa hazırlaşarkən naməlum şəxs əlində silahla içəri daxil olub.
Kassaya yaxınlaşan şəxs silahı Leoya tuşlayıb. O, daha sonra silahı piştaxtanın üzərinə qoyaraq kassadakı bütün pulları istəyib.

Mağaza sahibi azyaşlı övladına heç nə etməməsi qarşılığında bütün pulları verməyə razılaşıb. Lakin həmin şəxs silahla piştaxtanın arxasına keçəndə onunla Leo arasında dava düşüb. Bu zaman mağaza sahibinin qızı əlindəki beysbol sopası ilə şübhəli şəxsə vurmağa başlayıb.
Leo sonda silahı adamın əlindən ala bilib və oğru silahını və pulu götürmədən hadisə yerindən qaçıb. 

Qızı ilə qürur duyduğunu deyən ata bildirib ki, görüntülərə baxana qədər övladının ona kömək etməyə çalışdığını anlamayıb.

Polis qısa müddətdə 37 yaşlı Konçobhar Morrell adlı soyğunçunu yaxalayıb.

Şübhəlinin daha əvvəl də birinci dərəcəli soyğunçuluğa görə həbs edildiyi üzə çıxıb.

Billurə Yunus