Bütün variantlar masa üzərindədir - Gürcüstana XƏBƏRDARLIQ 

Gürcüstan hakimiyyətinin sabiq prezident Mixail Saakaşvilinin partiyası və ona bağlı birliklərin fəaliyyəti ilə bağlı bəyanatı qalmaqala səbəb olub. Belə ki, hökumət onların fəaliyyətini konstitusiyaya zidd kimi tanımaq təşəbbüsündə bulunub. Bunun həyata keçirilməsi isə Avropa Komissiyasının reaksiyasına səbəb olacaq. 

Ölkə.Az xəbər verir ki, bunu "Politico"ya Aİ-nin xarici siyasət xidmətinin sözçüsü Piter Stano Gürcüstan hakimiyyətinin planlarını şərh edərkən deyib.

“Mövcud fəaliyyət kursu Gürcüstanın Avropa İttifaqına (Aİ) yolunu təhlükə altında qoyur, üzvlük prosesini faktiki olaraq dayandırır. Avropa Komissiyası Gürcüstanın ritorikasını və hadisələrin gedişatını diqqətlə izləyir. Aİ buna uyğun cavab verməyə hazırdır. Bütün variantlar masanın üstündədir və o bəyanatlar reallaşarsa, biz buna uyğun hərəkət edəcəyik”, – Stano qeyd edib. 

Xatırladaq ki, avqustun 20-də hakim “Gürcü Arzusu-Demokratik Gürcüstan” partiyası bəyanat yayıb ki, qarşıdan gələn parlament seçkilərində qalib gəlsə və qanunverici orqanda konstitusiya çoxluğunu qazansa, keçmiş prezident Mixail Saakaşvilinin “Vahid Milli Hərəkat” partiyası və ona bağlı olan təşkilatları konstitusiyaya zidd addım kimi tanıyacaq.

Mürtəza
Ölkə.Az