Yəməndə partlayış

16 Yəmən əsgəri dünyasını dəyişib

Ölkə.Az "Reuters"ə istinadla xəbər verir ki, Marib vilayətində yolun kənarında quraşdırılmış partlayıcı qurğunun işə düşməsi nəticəsində 16 Yəmən əsgəri dünyasını dəyişib.

Bundan əlavə, 6 əsgər ağır yaralanıb. Terror aktının kim tərəfindən törədildiyi məlum deyil. Bir müddət öncə Səudiyyə Ərəbistanı və BƏƏ husilərlə mübarizəyə təyyarələrin çoxunu yönləndirib.

Səudiyyə Ərəbistanı martın 25-də husilərin Yəməndə ölkənin cənub əyalətlərinə irəliləməsinin qarşısını almaq və BMT-nin rəsmi olaraq tanıdığı prezident Əbd Rəbbi Mənsur Hadinin yenidən hakimiyyətə gətirilməsi məqsədilə Yəmənə qarşı hava hücumlarına başlayıb. 10 ərəb dövləti və ABŞ "Qətiyyət fırtınası" adlanan bu hərbi əməliyyatı dəstəkləyib.

Husilər ötən ilin sentyabrından Yəmənin paytaxtına hücum edib, Mənsur Hadi hakimiyyətini devirərək paytaxt Sənanı nəzarətə götürüb. O, ötən ay ölkənin cənubundakı Ədən şəhərinə sığınıb. Üsyançılar cənub regionlarına irəlilədiyinə görə onun artıq ölkədən çıxdığı deyilir. Mənsur Hadi BMT Təhlükəsizlik Şurası və Ərəb Dövlətləri Liqasından husiləri dayandırmaq üçün hərbi yardım istəmişdi.

Rəşid Mustafazadə

Ölkə.Az