Pakistan və Hindistan arasında gərginlik artıb
Cammu və Kəşmir ştatında 30 mindən artıq kənd sakini evlərini tərk edib
Ölkə.Az xəbər verir ki, Hindistanın Pakistanla sərhədində yerləşən Cammu və Kəşmir ştatında 30 mindən çox kənd sakini atışmalara görə öz evlərini tərk etməyə məcbur olub.
Cammu bələdiyyəsinin nümayəndəsi bildirib ki, Cammu rayonunda sərhədyanı kəndlərin 20 mindən çox sakini artıq evlərini tərk edib.
"Katxua və Samba sərhədyanı dairələrində uyğun olaraq 7 və 3 min dinc sakin evlərini tərk edib. Bu insanlar üçün təhlükəsiz yerlərdə çadır düşərgələri salınıb", - deyə nümayəndə əlavə edib.
Qeyd edək ki, ötən gecə Pakistan sərhədçiləri bütün nəzarət xətti boyunca atəş açaraq Hindistanın sərhəd qoşunlarının 60 postunu və 90 ətraf kəndi atəşə tutublar. Hindistan da atışmaya qoşulub və cavab atəşi açıb.
Nəticədə Hindistan tərəfi 8, Pakistan isə 2 nəfərini itirib.
Rəşid Mustafazadə
Ölkə.Az
