Davudoğlu İŞİD-lə mübarizə yolunu təklif etdi: \"Xoşagəlməz nəticələrlə üzləşə bilərik...\"

"Türkiyə hər gün koalisiya çərçivəsində İŞİD terror təşkilatına zərbələr endirir".

Ölkə.Az xəbər verir ki, bu fikirləri Türkiyənin baş naziri Əhməd Davudoğlu deyib.

"Biz son aylar ərzində müttəfiqlərimizə bildiririk ki, bizim məqsədimiz sərhədlərimizdən İŞİD-i sıxışdırmaq və sabitliyi bərpa etməkdir", - deyə baş nazir əlavə edib.

Onun sözlərinə görə, yerüstü və hava əməliyyatlarını birləşdirməyə qadir olan strategiya lazımdır.

"Türkiyə təkbaşına belə yükü üzərinə götürə bilməz. Koalisiya vahid strategiya hazırlayarsa, Türkiyə bu ssenaridə öz rolunu oynayacaq", - deyə Davudoğlu bildirib.

Baş nazir xüsusi olaraq qeyd edib ki, vahid strategiyanın yaradılması zərurətə çevrilib.

"İŞİD-ə qarşı yerüstü əməliyyatlar nəticəsində xoşagəlməz nəticələrlə üzləşə bilərik. Məsələn, İŞİD yerinə başqa terror təşkilatı yarana bilər. Suriya problemi kompleks şəkildə həll olunmalıdır", - deyə Davudoğlu bildirib.

Sonda Davudoğlu Misirdə sərnişin təyyarəsinə qarşı terror aktını bəşəriyyətə qarşı cinayət adlandırıb.

Rəşid Mustafazadə

Ölkə.Az