İsrail ordusu: "Hizbullah"ın Cənub Cəbhəsinin komandanı Karakini də öldürüldü

İsrail ordusu dünən gecə Beyruta hücum nəticəsində "Hizbullah" lideri Həsən Nəsrullahı və hərəkatın Cənub Cəbhəsinin komandanı Əli Karakinin öldüyünü təsdiqlədiyini açıqlayıb.

Ölkə.Az xəbər verir ki, İsrail ordusundan verilən açıqlamada deyilir: "Dünən gecə həyata keçirdiyimiz əməliyyat "Hizbullah"ın yüksək səviyyəli rəhbərləri qərargahda olarkən və İsrail vətəndaşlarına qarşı terror fəaliyyətlərini koordinasiya edərkən həyata keçirilib. Biz Beyruta endirdiyi hava hücumunda "Hizbullah" lideri Həsən Nəsrullahı öldürdük". 

Açıqlamada eyni zamanda bildirilir ki, ölənlər arasında "Hizbullah"ın Cənub Cəbhəsinin komandanı Əli Karaki və digər yüksək rütbəli komandirlər var.

"Hizbullah"dan isə liderlərinin ölüb-ölməməsi ilə bağlı rəsmi açıqlama verilməyib.

Lakin Fransanın AFP xəbər agentliyinə danışan və adının çəkilməsini istəməyən "Hizbullah" rəsmisi deyib ki, cümə axşamından etibarən Seyid Həsən Nəsrullah ilə əlaqə kəsilib.