ABŞ Arif Yunusun buraxılmasını alqışladı

"Biz ümid edirik ki, Azərbaycan hökuməti..."

Ölkə.Az xəbər verir ki, ABŞ dövlət katibi Con Kerri hüquq müdafiəçisi Arif Yunus barəsində həbs qətimkan tədbirinin aradan qaldırılması qərarını alqışlayıb.

"ABŞ hökuməti bu gün Bakı Apelyasiya Məhkəməsinin hüquq müdafiəçisi və tarixçi-alim Arif Yunus barəsində həbs qətimkan tədbirinin onun sağlamlığı ilə əlaqədar olaraq aradan qaldırılması qərarını məmnunluq hissi ilə qarşılayıb. Biz ümid edirik ki, Azərbaycan hökuməti gələcəkdə də analoji işlərə bu cür baxacaq", - deyə Kerrinin bəyanatında deyilir.

Xatırladaq ki, Bakı Apelyasiya Məhkəməsi Arif Yunus barəsində həbs qətimkan tədbirinin aradan qaldırılmasına qərar verib.

Arif Yunusun vəziyyəti oktyabrın 30-da yenidən ağırlaşıb və onu Penitensiar Xidmətin müalicə müəssisəsinə köçürüblər. Müalicə müəssisəsindən Apelyasiya Məhkəməsinə Arif Yunusun müalicəsinin bu şəraitdə mümkün olmadığına dair müraciət daxil olub.

Apelyasiya Məhkəməsi də bu müraciəti nəzərə alaraq Arif Yunus barəsində qətimkan tədbirinin dəyişdirilməsinə qərar verib.

Rəşid Mustafazadə

Ölkə.Az