Ankara terrorunda heyrətə gətirən fədakarlıq - İnanılmaz
Səsdən iti Hürjet təyyarəsinin 3 mühəndisinin terror aktı zamanı etdiyi hərəkət insanları heyrətə gətirib.
Ölkə.Az xəbər verir ki, Türkiyənin nəqliyyat və infrastruktur naziri Abdulkadir Uraloğlu TUSAŞ-dakı terror zamanı Hürjetlə bağlı heyrətamiz bir detalı açıqlayıb.
Nazir deyib ki, TUSAŞ-ın önəmli layihələrindən biri Hürjetdir. "Hücum zamanı Hürjetin başında menecer komandasını toplayaraq onları təhlükəsiz anqara aparır, qapıları bağlayır və əməkdaşların yoxlayır. Yoxlama zamanı bəlli olur ki, 3 əməkdaş yoxdur. Tələsik olduqları yerləri araşdırırlar. Görürlər ki, həmin 3 nəfər istehsal etdikləri Hürjeti brezentlə örtməyə çalışırlar.
Onlardan "niyə belə edirsiniz?" soruşanda çox maraqlı bir cavab verirlər: "Terrorçular içəri girsələr, təyyarəyə zərər verməsinlər". Bu düşüncə insanlarımıza hakim olduqca kimsə bizim yolumuzu kəsə bilməz", - nazir qeyd edib.
O əlavə edib ki, öz avtomobillərini, rabitə və müşahidə peyklərini, döyüş təyyarələrini, helikopterlərini, gəmilərini və elektrik qatarlarını istehsal etməklə tarixə damğasını vuran bir prosesdən keçiblər: "Bu proses xalqımızın öz gücü, özünə inamı, işıqlı gələcəyimizə inamı ilə yüksəlişinin simvolu oldu. Bir vaxtlar “mümkün deyil” deyilənlər bu gün reallığa çevrilib.
Bu uğur bütün Türkiyənin birgə səyi ilə əldə edilib. Bu yüksəlişi pozmaq, özlərinə olan inamlarını məhv etmək istəyənlər keçən həftə müdafiə sənayemizin qürurlarından olan TUSAŞ-a iyrənc hücuma keçdilər".
Mürtəza
Ölkə.Az
