Tramp "Twitter"ini Heminqueyin əsərləri ilə müqayisə etdi

"140 işarəlik Ernest Heminqueyəm"

Ölkə.Az-ın xəbərinə əsasən, ABŞ-da Respublikaçılar partiyasından prezidentliyinə namizəd, milyarder Donald Tramp bəyan edib ki, dünya onun sosial şəbəkələrdəki yazılarının nə dərəcədə dahiyanə olduğunu tam anlaya bilmir və öz "Twitter" hesabını Ernest Heminqueyin əsərləri ilə müqayisə edib.

"Kimsə deyib ki, mən 140 işarəlik Ernest Heminqueyəm", - deyə Tramp Cənubi Karolinada seçkiöncəsi kampaniyada bildirib.

Bir müddət öncə Donald Tramp Paris hadisələrinə cavab olaraq ABŞ-da məscidlərin bağlanması məsələsinə ciddi baxmağı təklif edib.

Qeyd edək ki, keçirilən sorğulara əsasən, Donald Tramp respublikaçı namizədlər arasında liderdir. İndiyədək seçki kampaniyalarında səbəbkar olduğu qalmaqalların onun reytinqinə müsbət, yoxsa mənfi təsir etdiyi isə hələ də bilinmir.

Tramp kampaniyalar zamanı cəmiyyət içində rəqiblərindən birini təhqir edib, teledebat işçiləri ilə mübahisə edib və Respublikaçılar partiyasının bir neçə üzvü ilə dalaşıb.

Rəşid Mustafazadə

Ölkə.Az