Xamenei: "Suriya ordusunun motivasiyası qalmamışdı"

"Müharibəni ölkənin ordusu aparmalıdır. Məhz həmin ölkənin ordusu ilə başqa yerdən gələn səfərbərlik qüvvələri birlikdə döyüşə bilərlər. Əgər o ölkənin ordusu zəiflik göstərsə, səfərbərlikdən heç nə alınmayacaq və çox təəssüf ki, belə də oldu".

Ölkə.az Oxu.Az-a istinadən xəbər verir ki, bu sözləri Suriyadakı son hadisələrə münasibət bildirən İran İslam Respublikasının Ali Rəhbəri Seyid Əli Xamenei deyib.

O vurğulayıb ki, İran Suriya hakimiyyətinə hərbi dəstək verməyə hazır olub:

"Bu çətin vəziyyətdə belə, biz hazır idik və mənə dedilər ki, bu gün suriyalılar üçün lazım olan bütün imkanları hazırlamışıq və getməyə hazırıq. Amma səma bağlandı, İsrail və ABŞ Suriya səmasını və quru yollarını bağladılar, getmək mümkün olmadı".

İran İslam Respublikasının ali rəhbəri əlavə edib ki, Suriya ordusunun döyüşməyə motivasiyası qalmamışdı:

"Əgər o ölkənin daxilində motivasiya qalsaydı və düşmən qarşısında söz sahibi ola bilsəydilər, düşmən nə səmanı, nə də quru yolunu bağlaya bilərdi. Yəni onlara kömək etmək olardı".