Türkiyədə 16 yaşdan kiçiklər üçün qadağa hazırlanır - Səbəb 

Türkiyə hakimiyyəti 16 yaşdan kiçik uşaqların sosial şəbəkələrə və onlayn oyunlara girişini məhdudlaşdıra bilər. 

Ölkə.Az "TRT Haber"ə istinadən xəbər verir ki, bu barədə ölkənin nəqliyyat və infrastruktur naziri Əbdülkadir Uraloğlu məlumat verib.

“16 yaşından kiçik uşaqlarımızı sosial medianın və onlayn oyunların zərərindən qorumaq və bunun qarşısını almaq üçün qanunvericiliyə ehtiyac zərurətə çevrilib. Bu, ilk növbədə internet provayderlərinin və sosial şəbəkə platformalarının sahiblərinin məsuliyyətini artıracaq”, - nazir parlamentdə büdcə dinləmələrində deyib. 

Nazirin sözlərinə görə, Türkiyə hakimiyyəti sosial şəbəkələrdə zorakılıq, uşaq istismarı, nifrətə çağırış və digər neqativ məzmunlu materialların yayılması ilə əlaqədar məhdudiyyətlərin tətbiqi məsələsini öyrənməyə başlayıb. “Biz öz qurumlarımız, ailə işləri, ədliyyə və daxili işlər nazirlikləri ilə birgə müvafiq işlər görürük. Bir vətəndaş və bir rəhbər kimi parlamentimizdən lazımi hüquqi tədbirlər görməsini gözləyirəm. İnanıram ki, birlikdə hərəkət etməklə biz bu təhlükəni dəf edə və uşaqlarımız üçün daha təhlükəsiz gələcək təmin edə bilərik”, - nazir bildirib.

Mürtəza
Ölkə.Az