259 sərnişin, 100 donuz... - Təyyarə qeyri-adi səbəbdən Bermud adalarına məcburi eniş etdi
Amsterdamdan Mexikoya uçan KLM şirkətinə məxsus təyyarə qeyri-adi problem üzündən Bermud adalarına enmək məcburiyyətində qalıb.
Ölkə.az Qaynarinfo-ya istinadən xəbər verir ki, təyyarədə 259 sərnişindən başqa 100 diri donuz olub. Kokpit daxil olmaqla, bütün təyyarəyə kəskin heyvan qoxusu yayılıb. Təyyarənin kapitanı dispetçerlə əlaqə saxlayıb və təyyarəni ventilyasiya etmək üçün təcili enişə ehtiyac olduğunu bildirib. O, vəziyyətin fövqəladə olmadığını, lakin salonda şəraitin pisləşdiyini qeyd edib.
Enişdən sonra sərnişinlər və ekipaj immiqrasiya nəzarətindən keçib və adadakı otellərə yerləşdirilib. Təyyarə havalandırılıb və 30 saatdan sonra sərnişinlər Meksikaya səfərlərini davam etdiriblər.
Donuzlar da öz növbəsində baytarların nəzarəti altında adada qalıblar. Bermuda səlahiyyətliləri qeyd edib ki, heyvanlar məcburi dayanma müddətində ehtiyac duyduqları hər şeylə təmin edilib.
Qoxunun kabinəyə niyə daxil olduğu aydın deyil - bunun yük konteynerinin düzgün yerləşdirilməməsi səbəbindən baş verdiyi ehtimal edilir. Bermud adalarında iki gün qaldıqdan sonra donuzlar başqa bir təyyarə ilə Meksikaya göndərilib. Onların sonrakı taleyi ilə bağlı heç bir məlumat verilmir.
"Biz adaya gələn bütün ziyarətçilərin rahatlığını təmin etməyə qərarlıyıq - onlar istər iki, istərsə də dörd ayaq üstə gəzirlər", deyə Bermud hava limanından bildirib.
