Rusiyaya yarım milyard rubl ziyan vuran azərbaycanlı tutuldu

FTX-a azərbaycanlıya qarşı əməliyyat keçirdi

Moskvanın Şeremetyevo hava limanında Rusiya Federal Təhlükəsizlik Xidmətinin (FTX) əməkdaşları pasport nəzarətini keçən Elşad Hüseynovu saxlayıblar.

O, ƏDV-nin qeyri-qanuni ödənilməsi üzrə cinayət işində əsas şübhəlidir.

Elşad Əfsər oğlu Hüseynov Rusiyanın Perm vilayətində tanınmış cüdoçu, Perm diyarı Cüdo Ustaları Federasiyasının rəhbərlərindən biridir. O, dəfələrlə Rusiya Dövlət Dumasının deputatı Dmitri Qorovtsovun köməkçisi olduğunu bəyan edib. Deputatın üzvü olduğu “Ədalətli Rusiya” Partiyasından Elşad Hüseynovun həqiqətən də rəsmən Dövlət Duması üzvünün köməkçisi vəsiqəsini aldığını təsdiqləyiblər.

Ura.ru-nun məlumatlı mənbəsinin sözlərinə görə, Hüseynovun tərkibinə daxil olduğu mütəşəkkil cinayətkar dəstə 2011-2014-cü illərdə fəaliyyət göstərib. Onlar Perm vilayətinin Solikamsk şəhəri və Mendeleyevo şəhərlərində özəl tədarükçülərdən taxta-şalbanları topdan satış qiymətləri ilə alaraq və sonradan Azərbaycan, İran, Çin və digər Asiya ölkələrinə ixrac edərək, bütün bu xərcləri Rusiya Federasiyasının dövlət büdcəsinə köçürülməli olan əlavə dəyər vergisinin qeyri-qanuni mənimsənilməsi yolu ilə ödəyiblər.

Ümumilikdə Hüseynovun qruplaşmasının Rusiya dövlətinə 101 milyon rubl ziyan vurduğu bildirilir. Bəzi məlumatlara görə, ümumilikdə dövlətə vurulmuş ziyan hətta yarım milyard rubl da təşkil edə bilər./Oxu.az/

Ölkə.Az