Rus qaçaqmalçılar sanksiyalara baxmayaraq Avropadan lüks avtomobillər gətirir

Rusiyalı qaçaqmalçılar sanksiyalara məruz qalmış avtomobilləri Avropadan ölkəyə gətirməklə ciddi gəlir əldə edirlər. Varlı rusiyalılar lüks avtomobillər üçün on minlərlə avro ödəməyə hazırdır.

Ölkə.az Qaynarinfo-ya istinadən xəbər verir ki, "Financial Times"ın araşdırmalarına görə, beş rus şirkəti Avropadan avtomobillərin qaçaqmal yolu ilə idxalını təklif edir.

Məsələn, "Auto.ru" saytında "Avtoimport" adlı rus idxalçısının BMW 530 d M Sport avtomobilini 68 200 ABŞ dollarına satışa çıxardığı bildirilir. Fotolardan avtomobilin hələ Almaniyada olduğu görünür. Dekabrın ortalarına qədər həmin avtomobil Almaniyanın "Autopartner BGL" şirkəti tərəfindən 31 900 avroya satılırdı. Şirkətin nümayəndəsi bildirib ki, avtomobil Almaniyada qalır və həmin tarixə qədər satılmayıb.

Jurnalistlər rus saytında 25 müxtəlif alman avtosalonundan olan 50-dən çox lüks avtomobili tapıb. Bu avtomobillər orta hesabla 19 000 avro qiymət fərqi ilə təklif olunur.

Qaçaqmalçılar avtomobillərin əvvəlcə üçüncü ölkələrə göndərildiyini bildirirlər. FT-nin araşdırması göstərir ki, qara rəngli "Mercedes-Benz S350" avtomobili 2024-cü ilin yanvarında almaniyalı "Kessler&Haag" treyderindən Qırğızıstan taksi şirkətinə satılıb, mart ayında isə Moskva taksi şirkətinə qeydiyyata alınıb.

"Avtoimport" nümayəndəsi isə avtomobillərin Belarus deyil, Türkiyə və Gürcüstan üzərindən gətirildiyini bildirib. O əlavə edib ki, hazırda bahalı avtomobilləri Cənubi Koreya vasitəsilə gətirmək daha sərfəlidir, çünki bu ölkə Rusiyaya qarşı minimal sanksiyalar tətbiq edib.

Buna baxmayaraq, FT bəzi avtomobillərin Belarus vasitəsilə gətirildiyini də müəyyən edib. Məsələn, "Gruma Automobile" tərəfindən satıldığı iddia edilən "Mercedes-Benz E220D" avtomobili sentyabr ayında Avropa İttifaqının xarici sərhədini keçərək Belarus vasitəsilə Rusiyaya gətirilib. Şirkət bu avtomobili satmadığını və sanksiyaya məruz qalmış ölkələrdə fəaliyyət göstərmədiyini bildirib.

Alman avtomobil satıcılarının bəziləri avtomobillərinin Rusiyada satıldığından xəbərsiz olduqlarını bildirirlər. Məsələn, "Autohaus Reisert" şirkətindən Markus Klapper qeyd edib ki, avtomobillərin şəkilləri və məlumatları vasitəçilər tərəfindən surətlənərək daha yüksək qiymətlərlə təklif olunur.

Aİ rəsmiləri lüks avtomobillərin Rusiyaya keçdiyini bilsələr də, əsas diqqəti daha təhlükəli mallarla bağlı sanksiyaların icrasına yönəldirlər.

Sanksiyaların yan keçilməsi - Lüks avtomobillər Moskvaya necə çatır?

Rusiyada Avropa istehsalı olan lüks avtomobillərin alınması hələ də mümkündür. Bu məsələdə əsas rol oynayan ölkələrdən biri Gürcüstan və Mərkəzi Asiyanın bəzi ölkələridir.

"The Times" qəzetinin müşahidəçisi Ed Konvey yeni "Range Rover" avtomobilinin Solihalldan Rusiyaya necə çatdırıldığını araşdırıb. O qeyd edir ki, Moskvanın sanksiyalardan yayınma taktikası Pekin tərəfindən yaxından izlənilir və bu, Tayvan məsələsindəki potensial gərginlik fonunda təhlükəli ola bilər.