Rusiyada miqrantlarla bağlı vacib YENİLİKLƏR 

Rusiyada yeni qaydalara əsasən miqrantlar üzərində dövlət nəzarəti çərçivəsində polis əməkdaşları əcnəbilərin faktiki yaşadığı mənzillərə və digər binalara daxil olmaq hüququna malik olacaqlar.

Ölkə.Az APA-ya istinadən xəbər verir ki, müvafiq qaydalar martın 5-dən qüvvəyə minəcək qanunda öz əksini tapıb.

Polis, həmçinin Rusiya dövlət orqanlarından və xarici dövlətlərin hakimiyyət orqanlarından dövlət nəzarətinin həyata keçirilməsi üçün zəruri olan, o cümlədən kommersiya, bank, vergi və qanunla qorunan digər sirləri təşkil edən məlumat və sənədləri tələb edə biləcək.

Polisin bundan başqa sürgün rejimində olan əcnəbinin bank hesablarının olması və onların nömrələri, bu hesablar üzrə pul vəsaitlərinin hərəkəti barədə banklardan məlumat almaq ixtiyarı olacaq.

Martın 5-dən Daxili İşlər Nazirliyinin əməkdaşları da bu rejimdə, o cümlədən texniki vasitələrdən istifadə etməklə əcnəbi vətəndaşlara nəzarət edə biləcəklər.

Qaydalar, həmçinin bu cür əcnəbilərin Rusiya ərazisində qalmasına köməklik göstərən fiziki və hüquqi şəxslərə də şamil edilir.

Qeyd edək ki, Rusiyada martın 5-dən ölkədə qeyri-qanuni olan və ya qanunu pozan əcnəbilərin və ya vətəndaşlığı olmayan şəxslərin ölkədən çıxarılması üçün miqrasiya rejimi qüvvəyə minir. Onlar üçün müəyyən hüquq və azadlıqlar məhdudlaşdırılacaq və onlara miqrasiya sahəsində federal dövlət nəzarəti tədbirləri də tətbiq ediləcək.