Apple "Siri"yə görə 95 milyon dollar təzminat ödəyəcək

ABŞ-ın texnologiya nəhənglərindən biri olan “Apple”a qarşı məhkəmədə iddia qaldırılıb.

Ölkə.Az “Anadolu” agentliyinə istinadla xəbər verir ki, “Apple”ın səs köməkçisi texnologiyası "Siri"nin istifadəçilərin məxfiliyini pozduğu iddia edilib.

İttiham aktında “Siri”nin istəmədən aktivləşdirilə biləcəyi və istifadəçilərin yazılan söhbətlərinin onların razılığı olmadan üçüncü şəxslərlə paylaşıldığı bildirilib.

Kütləvi şəkildə edilən şikayətlərdən sonra şirkət razılaşmaya gedərək 95 milyon dollar təzminat ödəməyi qəbul edib.

Sövdələşmə təsdiqlənərsə, "Siri"ni dəstəkləyən cihazların istifadəçiləri hər cihaz üçün 20 dollara qədər pul ala bilər.

Sövdələşmə ABŞ-də 17 sentyabr 2014-cü il və 31 dekabr 2024-cü il tarixləri arasında “Siri” ilə işləyən iPhone, iPad, Apple Watch, MacBook, iMac, HomePod, iPod touch və ya Apple TV-yə sahib olan istifadəçiləri əhatə edir.
 Qeyd edək ki, istifadəçilərə "Siri"ni sərbəst şəkildə aktivləşdirməyə imkan verən "Hey Siri" funksiyası 2014-cü ildə təqdim edilib.

Billurə Yunus