Husilər İsrailə zərbə endiriblər

Yəmənin Ənsar Allah(Husi) hərəkatının silahlıları Təl-Əviv bölgəsindəki elektrik stansiyasına uğurlu zərbə endiriblər. "Ölkə.az" xəbər verir ki, bu barədə husilərin sözçüsü Yəhya Sariya bildirib.

"Yəmən Silahlı Qüvvələrinin raket qüvvələri hərbi əməliyyat keçirərək İsrailə məxsus elektrik stansiyasına Fələstin 2 hipersəs ballistik raketi ilə hücum edib", - telekanal rəsmi sözçünün sözlərinə istinadən bildirib.

Sariyanın sözlərinə görə, hədəf uğurla vurulub. Bundan əlavə, İsrail Müdafiə Qüvvələrinin (IDF) hərbi obyektlərindən birinə pilotsuz uçuş aparatının (PUA) hücumunun da həyata keçirildiyi bildirilir.

Ötən il dekabrın 31-də husilər Amerikanın “USS Harry S. Truman” təyyarədaşıyan gəmisinə raket və dronlarla hücum etmişdilər. Eyni zamanda, dekabrın 28-də ABŞ və Böyük Britaniya yəmənli hərbçilərin Negev səhrasındakı İsrailin Nevatim hava qüvvələri bazasına hipersəs ballistik raketlə hücumuna cavab olaraq onların mövqelərinə hücum edib.

Elvin

Ölkə.az