ABŞ kiber hücuma görə Çin şirkətinə sanksiya tətbiq etdi 

ABŞ əvvəllər kiberhücumlarda iştirakda ittiham olunan Çinin Integrity Technology Group şirkətinə qarşı sanksiyalar tətbiq edib.

"Ölkə.az" xəbər verir ki, bu barədə ABŞ Maliyyə Nazirliyi məlumat yayıb.

Dekabrın 31-də ABŞ Maliyyə Nazirliyi öz elektron sistemlərinə kiberhücum barədə məlumat yayıb. Onların fikrincə, bu hücumda Çindən olan hakerlər iştirak edib.

Bildirilir ki, Xəzinədarlıq Departamentinin proqram təminatı üzrə podratçılarından biri olan BeyondTrust, hakerlərin Xəzinədarlığın əməliyyat sistemlərinə və oradakı sənədlərə daxil olmaq imkanı verən təhlükəsizlik açarını uzaqdan əldə etdiyini açıqlayıb.

İnsident nəticəsində elektron sistem şəbəkədən ayrılıb və ABŞ rəsmilərinin məlumatına görə, hakerlərin hazırda Xəzinədarlıq sistemlərinə çıxışı yoxdur. Agentlik hadisəni araşdırmaq üçün FTB ilə fəal əməkdaşlıq edir.

Noyabrın sonunda CNN bildirmişdi ki, Birləşmiş Ştatlar çinli hakerlərin ABŞ telekommunikasiya şirkətlərinin şəbəkələrinə müdaxilə edə bildiyinə və Vaşinqtonda yüzə yaxın siyasətçinin zənglərini izləyə bildiyinə inanır.