Dünyanın ən böyük neft limanları TƏHLÜKƏDƏ
Dəniz səviyyəsi bir metr qalxarsa, dünyanın ən böyük neft limanları su altında qala bilər.
"Ölkə.az" xəbər verir ki, bu barədə “The Guardian” məlumat yayıb.
Nəşrin yazdığına görə, İsveçin iqlim təşkilatı ICCI-nin apardığı tədqiqat nəticələrinə əsasən, Çin, Niderland, Birləşmiş Ərəb Əmirlikləri, Cənubi Koreya, Rusiya, Səudiyyə Ərəbistanı, Sinqapur və ABŞ-da yerləşən 13 liman su basma riski ilə üzləşə bilər.
Bu limanların fəaliyyəti qlobal neft ticarətinin əsasını təşkil etdiyindən, yaranan risklər yalnız yerli iqtisadiyyatlara deyil, həmçinin dünya enerji bazarına da ciddi təsir göstərə bilər.
Mütəxəssislər xəbərdarlıq edirlər ki, bu risklər yalnız infrastruktur üçün deyil, eyni zamanda liman şəhərlərində yaşayan milyonlarla insan üçün də təhlükə yaradır. Su basqınlarının qarşısını almaq üçün limanlarda qoruyucu bəndlərin inşası və digər iqlimə davamlı tədbirlərin görülməsi təklif olunur.
ICCI-nin hesabatında vurğulanır ki, bu limanlar strateji əhəmiyyət daşıyır və dəniz səviyyəsinin yüksəlməsi onların iqtisadi və logistik funksiyalarını iflic edə bilər. Buna görə də, iqlim dəyişikliyinə qarşı qlobal səylərin artırılması və karbon emissiyalarının azaldılması həyati əhəmiyyət kəsb edir.(musavat.com)
