Trampın Ağ evə gəlişi İran üçün kabus olacaq

Donald Trampın administrasiyasında ABŞ-ın dövlət katibi olacaq Mayk Pompeo deyib ki, Trampın Ağ evə qayıtmasının İrana qarşı sərt "maksimum təzyiq" siyasətinin yenidən başlayacağını söyləyib.

Ölkə.az Lent.az-a istinadən xəbər verir ki, o, bu barədə İran müxalifətinin lideri Məryəm Rəcəvi ilə İran Milli Müqavimət Şurasının Fransadakı qərargahında baş tutan görüşdə danışıb.

Pompeonun sözlərinə görə, Tramp yeni prezidentlik müddətinin ilk günündən “qanlı diktatura” kimi xarakterizə etdiyi Ayətullah Xamenei rejiminə qarşı qətiyyətli addımlar atmaq niyyətindədir. Pompeo vurğulayıb ki, Tehranı iqtisadi və diplomatik cəhətdən təcrid etməyə yönəlmiş siyasətlər keçmişdə özünü doğruldub və davam etdirilməlidir.

O, həmçinin ABŞ-dakı demokrat siyasətçiləri və Avropa İttifaqının liderlərini İran rejimini “rahatlaşdırmaqda” günahlandırıb və 2015-ci ildə Obama administrasiyası zamanı imzalanmış Birgə Hərtərəfli Fəaliyyət Planının uğursuzluğunu xatırladıb.

2018-ci ildə Tramp Tehranın terrorçu qrupları maliyyələşdirməyə davam etdiyini və sazişin şərtlərini pozduğunu əsas gətirərək nüvə sazişindən çıxıb. Bunun müqabilində İran iqtisadiyyatına ciddi zərbə vuran sərt sanksiyalar tətbiq olunub.

Pompeo həmçinin İranın bölgədəki son uğursuzluqlarını, o cümlədən Suriyada Bəşər Əsədin devrilməsi və Livanda “Hizbullah”ın zəifləməsini qeyd edərək, bunları İranın nüfuzunun azalmasının “birbaşa nəticəsi” adlandırıb. O əlavə edib ki, HƏMAS Qəzzada tam məğlubiyyət ərəfəsindədir və Tehranın bölgədəki hərəkətləri onun əvvəlki mövqelərini saxlaya bilmədiyini nümayiş etdirir.

İran müxalifətinin lideri Məryəm Rəcəvi Pompeonun bəyanatını dəstəkləyərək molla rejiminə təzyiqlərin davam etdirilməsinin vacibliyini vurğulayıb.

O, İran Milli Müqavimət Şurası və İran Xalq Mücahidləri Təşkilatının ölkədə demokratik dəyişikliklər uğrunda mübarizəyə rəhbərlik etməyə hazır olduğunu bildirib və beynəlxalq ictimaiyyəti İran xalqının müqavimət haqqını tanımağa çağırıb.