Qrenlandiya müstəqillik referendumu keçirəcək?

Qrenlandiya hakimiyyətinin adanın Danimarkadan müstəqilliyi ilə bağlı referendum keçirməklə bağlı hələlik konkret planları yoxdur. 

"Ölkə.az" xəbər verir ki, bu barədə Danimarkanın DR telekanalı məlumat yayıb.

"Qrenlandiya parlamentində müstəqillik tərəfdarı olan dörd partiyadan heç birinin Qrenlandiyada referendum keçirmək istədikləri vaxtla bağlı konkret planları yoxdur ki, bu da müstəqilliyə nail olmaq üçün ilkin şərtdir", deyə bildirilib.

Müəlliflərin fikrincə, Qrenlandiyanın bir çox yüksək vəzifəli şəxsləri adanın müstəqil ölkə olmasını istəyir.

Bir gün əvvəl Qrenlandiyanın baş naziri Mute Egede demişdi ki, adanın sakinləri nə danimarkalı, nə də amerikalı olmaq istəmirlər. O xatırladıb ki, bundan əvvəl Danimarka və Qrenlandiya parlamentləri özünüidarə haqqında qanun qəbul ediblər, ona görə də Qrenlandiya lazım bildiyi zaman müstəqilliyini elan edə bilər.

Yanvarın 7-də ABŞ-ın yeni seçilmiş prezidenti Donald Tramp deyib ki, Qrenlandiya ABŞ-ın bir hissəsi olmalıdır, çünki bu, milli təhlükəsizlik və azad dünyanın qorunması üçün strateji əhəmiyyət kəsb edir, o cümlədən Çin və Rusiyadan.(Qaynarinfo)