BBC: Putin və Ərdoğan...

"Yəqin ki, ən narahatlıq doğuran məsələ də budur"

Ölkə.Az xəbər verir ki, BBC yayım şirkəti Türkiyə tərəfindən Su-24 təyyarəsinin vurulmasını şərh edib.

Mark Louen yeni yazısında Türkiyə prezidenti Rəcəb Tayyıb Ərdoğan və Rusiya Federasiyası dövlət başçısı arasında bir çox ortaq cəhətlərin olduğunu bildirib.

"Ərdoğan ötən il baş nazir vəzifəsindən prezidentliyə keçərkən Putinləşməkdə ittiham edilmişdi. İki şəxs arasında doğrudan da maraqlı oxşarlıqlar var. Hər ikisi də güclü şəxs imici yaradıblar. Hər ikisini dəstəkləyənlər onlara heyran olsa da, müxalif qüvvələr tərəfindən ölkədə demokratiyanı eroziyaya uğratmaqda günahlandırılırlar. Hər iki lider son böhrana eyni şəkildə reaksiya verir: sərt dildən istifadə edərək güc göstərirlər", - deyə Louen qeyd edib.

Hər iki dövlət başçısının da milliyyətçi dalğasıyla yüksəldiyi deyilən yazıda Krım işğalının Putinin, PKK-yə qarşı mübarizənin isə Ərdoğana son seçkilərdə populyarlıq qazandırdığı xatırlanır.

BBC iki ölkə arasındakı sıx əlaqələr və iqtisadi maraqların olduğunu qeyd edərək, hər iki liderin siyasi davranışlarının yumşalacağını yazıb.

"Amma bu vəziyyətin ciddiliyini aradan qaldırmır. Hər iki güclü adamın bir ortaq nöqtəsi da məhz nə edəcəklərinin əvvəlcədən bilinməməsidir. Yəqin ki, ən narahatlıq doğuran məsələ də budur", - deyə müəllif bildirib.

Noyabrın 24-də səhər saatlarında Rusiyanın Suriyadakı hərbi aviasiya qrupuna məxsus "Su-24" döyüş təyyarəsi Türkiyənin hava sərhədini pozub. Türkiyə Hərbi Hava Qüvvələri ərazini tərk etmələri üçün ruslara 10 dəfə xəbərdarlıq edib. Bundan sonra Türkiyənin "F-16" qırıcıları "Su-24"ü zərərsizləşdirib.

Rəşid Mustafazadə

Ölkə.Az