Türkiyədə tapılan kəllə Kleopatranın ögey bacısına məxsus olub?

Vyana Universitetinin mütəxəssislərinin rəhbərlik etdiyi beynəlxalq alimlər qrupu, təxminən 100 il əvvəl Türkiyənin Efes xarabalıqlarında tapılan kəllə sümüyünü tədqiq ediblər.

Ölkə.az Teleqraf.com-a istinadən xəbər verir ki, uzun müddətdir qalıqların məşhur Misir kraliçası Kleopatranın ögey bacısı IV Arsinoeyə aid ola biləcəyinə ehtimal olunurdu.

"Scientific Reports" (SciRep) elmi jurnalında dərc olunan elmi məqalədə isə bildirilir ki, naməlum şəxsin tam skeletinin olduğu sarkofaq 1929-cu ildə Avstriya arxeoloqları tərəfindən Octagon adlı binada qazıntılar zamanı aşkar edilib. Tədqiqatçılar kəlləni Vyanaya aparıblar, lakin sonrakı onilliklər ərzində elm adamları qalıqların kimliyini müəyyən edə bilməyiblər. 1990-cı illərdə sarkofaqdakı skeletin IV Arsinoeyə aid ola biləcəyinə dair bir nəzəriyyə ortaya çıxdı. Bunu dolayısı ilə tarixi faktlar göstərir ki, Arsinoe eramızdan əvvəl 41-ci ildə bacısının sevgilisi Mark Antoninin tələbi ilə Efesdə edam edilib .

Yeni araşdırmada komanda bu fərziyyələrə son qoyub. Efesdən gələn kəllənin IV Arsenoeyə aid olmadığı sübut edilib. Mikrokompüter tomoqrafiyası, kütləvi spektrometriya və genetik analizin nəticələri göstərdi ki, sarkofaqdakı skelet 11-14 yaş arası yeniyetmə oğlana məxsusdur.

Alimlər onu da müəyyən ediblər ki, uşaq sağlığında inkişaf pozğunluqlarından əziyyət çəkib. Bunu kəllə və üz sümüklərinin deformasiyası təsdiq edib.