Ötən ilin ən ölümcül təyyarə qəzasında qara qutular qeydi dayandırıbmış - Video

Cənubi Koreyanın Muan şəhərində "Jeju Air" təyyarəsinin qəzaya uğraması ilə bağlı yeni detal üzə çıxıb.

Ölkə.Az xarici KİV-ə istinadla xəbər verir ki, bu barədə Cənubi Koreyanın Nəqliyyat Nazirliyi məlumat yayıb. Rəsmilərin açıqlamasına görə, təyyarənin qara qutuları qəzadan 4 dəqiqə əvvəl məlumat yazmağı dayandırıb.

Qara qutular uçuş məlumatlarını və ekipaj üzvlərinin danışıqlarını qeyd edir. Bu isə qəzanın səbəblərini araşdıran səlahiyyətli orqanlar üçün çox vacibdir. Lakin bu kritik cihazların qəzadan 4 dəqiqə əvvəl qeydi dayandırması istintaqı çətinləşdirir.

Səlahiyyətlilər qara qutuların qeydi niyə belə erkən dayandırdığını araşdırmağa davam edir.

Təyyarə qəzasının mexaniki nasazlıq, yoxsa insan səhvi nəticəsində baş verməsi hələlik bəlli deyil.

Qeyd edək ki, sözügedən qəza ötən ilik 29 dekabrında baş verib. Boeing 737-800 tipli təyyarə eniş zamanı uçuş-enmə zolağından çıxaraq beton maneəyə çırpılıb və bu şiddətli toqquşma qəzanı ölümcül edib. Hadisə nəticəsində 179 nəfər ölüb, 2 nəfər sağ qalıb.

Bu faciəvi qəza Cənubi Koreyanın ən ölümcül aviasiya qəzası kimi qeydə alınıb. 

Onu da əlavə edək ki, 2024-cü il ərzində çox sayda mülki təyyarə qəzaya uğrayıb. Bu qəzalar içərisində ən ölümcülü 29 dekabrda baş verən qəza olub.

Billurə