Rusiya və Fransa İŞİD-ə qarşı birləşdi

İŞİD-in mövqelərinə hava hücumları gücləndiriləcək

Ölkə.Az xəbər verir ki, Moskvada danışıqlarda Fransa prezidenti Fransua Olland və Rusiya Federasiyası dövlət başçısı Vladimir Putin İŞİD terror təşkilatının mövqelərinə hücumları gücləndirməyi və informasiya mübadiləsi aparmağı qərara alıblar.

Olland bəyan edib ki, İŞİD-in mövqelərinə hava hücumları gücləndiriləcək və daha yaxşı koordinasiya ediləcək. Putin isə bildirib ki, tərəflər terrorizmlə mübarizədə operativ şəkildə informasiya mübadiləsini gücləndirməlidirlər.

"İnsidentlərdən qaçmaq üçün bizim hərbi mütəxəssislərin konstruktiv işini qurmaq planlaşdırılır", - deyə RF prezidentinin rəsmi saytında bildirilib.

Bundan əlavə, Vladimir Putin görüşün yekunlarına dair bəyan edib ki, Paris və Moskva Suriyada dinc müxalifətin mövqelərinə zərbələr endirməmək barədə razılıq əldə olunub.

Olland qeyd edib ki, Suriyada vətəndaş müharibəsinin qarşısının alınması siyasi həll yolları tələb edir. Onun fikrincə, prezident Bəşər Əsəd vəzifədən getməlidir. Putin isə Əsədin ordusunu terrorizmlə mübarizədə təbii müttəfiqlər adlandırıb.

Rəşid Mustafazadə

Ölkə.Az