Yer kürəsi təhlükədədir

Son bir ildə dünya miqyasında orta illik temperatur rekord dərəcəyə yüksəlib.

Ölkə.az atv.az-a istinadən xəbər verir ki, BMT-nin Dünya Meterologiya Təşkilatının açıqladığı son hesabat vəziyyətin nə qədər qorxulu olduğunu göz önünə sərir. 2015-ci ilin dünya tarixinə “ən isti il” kimi vurğulandığı hesabatda, Tibet və Qütb dairələrindəki buzlaqların sürətlə əridiyi qeyd olunub.

Təşkilatın baş katibi Mişel Jarrodun sözlərinə görə, artıq həyəcan təbili çalınır. O bildirib ki, atmosferdəki zərərli qazların miqdarı sürətlə artır və bunun qarşısının alınması istiqamətində Parisdə təşkil olunacaq BMT-nin “Beynəlxalq İqlim Konfransı”nda mütləq yekun qərarlar qəbul etmək labüddür:

"Çox narahatıq. Zaman bizim əleyhimizə işləyir. Artıq təcili addımlar atmalıyıq. Parisdəki İqlim Konfransında ortaq nəticəyə gəlinməlidir. Yenə də gec deyil. Bunun qarşısını almaq üçün çıxış yolları var".

BMT-nin son hesabatında qeyd olunur ki, qlobal istiləşmə dünyanın müxtəlif bölgələrində uzunmüddətli quraqlıqlara səbəb olacaq və bu da şirin su hövzələrinin quruması ilə nəticələnəcək. Bildirilir ki, ümumiyyətlə bu proses 50-60 il bundan əvvəl başlayıb, son illərdə isə intensiv xarakter alıb. Alimlər xəbərdarlıq edir ki, bütün bunlar əsasən antropogen təsirlər nəticəsində yaranır. Son illər qış mövsümlərinin mülayim keçməsinə diqqət çəkən elm adamları bəyan edir ki, “istixana effekti”nin təhlükəsi hər keçən gün dünyanı daha da çox təhdid edir.

Ölkə.az