Məşhur moda evləri Melaniya Trampdan imtina edir

ABŞ-ın yeni seçilmiş prezidenti Donald Trampın inauqurasiyasından əvvəl onun həyat yoldaşı, keçmiş model Melaniya Tramp məşhur moda evlərindən geyim əldə etməkdə çətinliklərlə üzləşib. 

"Ölkə.az" xəbər verir ki, bu barədə "Daily Mail" məlumat yayıb.

Moda dünyasının ən nüfuzlu jurnalı olan "Vogue"un baş redaktoru Anna Vinturun Melaniya Trampdan nümayişkaranə şəkildə uzaq durması və onun şəklini yenidən jurnalın üz qabığına yerləşdirməkdən imtina etməsi dizaynerlərin bu mövqeyinə əsas səbəb kimi göstərilir. Halbuki, ABŞ-ın bütün əvvəlki birinci xanımları və vitse-prezident Kamala Harrisin fotoları bu jurnalın üz qabığında yer alıb.

Onlarla məşhur dizaynerin Melaniya Tramp üçün xüsusi geyim hazırlamaqdan imtina etməsi səbəbilə gələcək birinci xanım öz geyim seçimlərində əsasən şəxsi zövqünə əsaslanır. "Daily Mail" jurnalistlərinin qeyd etdiyinə görə, bu vəziyyət onun qarderobunu "zamanla ayaqlaşan deyil, zamansız və dəbdəbəli" edir.

Buna baxmayaraq, Melaniya hələ də "Dior" və digər məşhur moda evlərinin mağazalarından adi müştəri kimi geyimlər ala bilir.

İyun ayının əvvəlində Melaniya Tramp oğlu Barron ilə birlikdə ictimaiyyət qarşısında görünüb. Bu dəfə keçmiş model "Max Mara" brendindən olan qəhvəyi rəngli kombinezon geyinib. Geyimini "Roger Vivier" brendindən olan, kombinezonun rənginə uyğun balet ayaqqabıları və dəvəquşu dərisindən hazırlanmış "Hermes Kelly" çantası ilə tamamlayıb.

Bundan əvvəl isə o, dəyəri 4 min dollar olan bir çanta ilə ictimaiyyət qarşısına çıxmışdı. Həmin vaxt Melaniya ağ futbolka, tünd yaşıl rəngli şalvar, qızılı rəngdə səndəllər və gün eynəyi ilə diqqət çəkmişdi.

Moda evlərinin boykotuna baxmayaraq, Melaniya Trampın şəxsi zövqü onun tərzini diqqət mərkəzində saxlamaqda davam edir.(qaynarinfo)