Türkiyə ərazisində neçə atom bombası var?

"Türkiyədə 60 atom bombası var"

"Atomic Scientists" jurnalında NATO-nun Avropadakı qüvvələrinin nəzdindəki kütləvi qırğın silahları haqda maraqlı material dərc olunub.

Ölkə.az xəbər verir ki, ABŞ-ın nüfuzlu hərbi jurnalı "soyuq müharibə"nin bitməsindən sonra ləğv olunmuş və hələ silahlanmada qalan atom bombaları haqda ətraflı məlumat verib.

Materialda bildirilir ki, NATO-nun Avropadakı atom bombaları və nüvə başlıqlarının sayı 1971-ci ildə 7300 ədəd olub. Nüvə silahının ləğv edilməsi haqda müqavilədən sonra isə bu say 200-ə düşüb. Hazırda bu 200 atom bombası və nüvə başlıqlarının Belçika, Almaniya, İtaliya, Hollandiya və Türkiyə olduğu vurğulanır.

Jurnalın məlumatına görə, Türkiyə ərazisindəki İncirlik hərbi bazasında 60 ədəd atom bombası və qitələrarası raketə birləşdirilmiş nüvə başlığı mövcuddur. Bu bombalar və nüvə başlıqları "soyuq müharibə" illərində SSRİ-nin şəhərlərinə yönəldilmiş vəziyyətdə olub. SSRİ dağılandan sonra nüvə gərginliyi başa çatdığına görə bu məsələ arxa plana keçib. Rusiyanın son illər fəallaşması, Ukrayna böhranı, Suriyada Bəşər Əsədin Rusiya və Çin tərəfindən aktiv dəstəklənməsi NATO-nu Avropada nüvə arsenalını yeniləməyə məcbur edib.

Jurnalın yazdığına görə, son hadisələrdən, Türkiyənin hava məkanına daxil olmuş rus qırıcısını vurmasından sonra Rusiyanın hakim dairələrindən Türkiyəni cəzalandırmaq haqqında fikirlərin səsləndirilməsi NATO-nu nüvə arsenalının gücünü yenidən yoxlamağa məcbur edib. Hazırda Türkiyə ərazisində həmin atom bombalarının saxlandığını yazan jurnal həmçinin bu silahın ikinci düyməsinin Türkiyənin siyasi hakimiyyətinin ixtiyarında olduğunu qeyd edib. Gələcəkdə ABŞ başda olmaqla müttəfiqlərinin Moskvadan gələn təhdidlərə qarşı qorunması üçün Avropadakı nüvə arsenalının gücləndiriləcəyi istisna edilmir.

Xatırladırıq ki, ağır strateji bombardımançıların daşıdığı ağır kilotonluq atom bombalarından əlavə Türkiyədəki atom bombalarının bir çoxu F-16-ların daşıyacağı ölçüdədir. ABŞ komandanlığına yaxınlığı ilə bilinən jurnalın materialından belə nəticəyə gəlmək olur ki, alyans Türkiyəni Rusiya qarşısında heç vaxt tək qoymayacaq.

Ölkə.az