Mahmud Abbas: "Əgər şans verilərsə, yaşamağı sevirik”

Nyu-Yorkda keçirilən BMT-nin baş assambleyasının 69-cu sessiyasında iştirak edən Fələstin hökuməti lideri yaddaqalan nitq söyləyib

Fələstin hökuməti lideri Mahmud Abbas BMT-nin ümumi iclasında söylədiyi nitqdə, BMT-nin bu ili Fələstin xalqı ilə Beynəlxalq Həmrəylik ili olaraq qəbul etməsinə baxmayaraq, özünün bu ili İsrailin Fələstin xalqına qarşı yeni bir soyqırım törətdiyi il kimi qəbul etdiyini bildirib.

Mahmud Abbas İsrailin Qəzzaya qarşı keçirdiyi son hücumlardan çox böyük əziyyət çəkdiklərini vurğulayıb: “Qəzzada keçirilən son əməliyyat bütün dünyanın gözləri qarşısında yaşanılan insanlıq suçu və cinayətdir. Bəziləri bunu İsrailin özünü müdaifə üsulu kimi təqdim edir. Belə danışan insanlar xalqımızın verdiyi minlərlə qurbanı görməyənlərdir. Fələstin xalqının da canı digər insanlar kimi qiymətlidir. Bunu yadınıza salmaq istədim. Fələstin xalqı adından isə onu demək istəyirəm ki, unutmayacağıq, bağışlamayacağıq və müharibə günahkarlarının cəzasız qalmaqlarına icazə verməyəcəyik!” 

“Qəzza zolağı 2 milyona yaxın fələstinli üçün dünyanın ən böyük həbsxanasına çevrilib. Misirin səyi ilə əldə edilən atəşkəsə inanırıq, lakin hər 2-3 ildən bir yenidən döyüşə əl atılır. Bunu həll etmək üçün isə İsrail Fələstini dövlət kimi tanımalıdır”– deyə Mahmud Abbas sözlərinə əlavə edib.

Çıxışında təsirli sözlər işlədən Mahmud Abbas sonda fələstinli şair Mahmud Dərvişin misraları ilə çıxışını tamamlayıb: “Biz sağalmayan xəstəlik olan ümid dərdinə yoluxduq. Əgər şans verilərsə, yaşamağı sevirik”.

Fələstin lideri çıxışından sonra uzun müddət alqışlanıb./Anspress/

Ölkə.Az