Daha bir ölkə İŞİD-i vuracaq

ABŞ Hərbi Hava Qüvvələrinə məxsus qırıcı təyyarələr Suriyada İŞİD terror qruplaşmasının mövqelərinə havadan zərbələr endirməyə davam edir.

Suriyanın Deir Əl-Zur vilayətində yaraqlıların 4 tankı məhv edilib, 1-i zədələnib.

Hücumlar zamanı neft obyektləri də hədəf alınıb.

Suriyanın İnsan Haqlarının Müşahidəsi qrupu islamçıların komandanlığının da dağıdıldığını bildirib.

İraqda isə 7 hava hücumu zamanı İŞİD-ə məxsus zirehli maşınlar vurulub. ABŞ Mərkəzi Komandanlığın bildirdiyinə görə, Kərkük yaxınlığında da bir neçə maşın və postlar dağıdılıb.

Böyük Britaniya parlamentində qərar təsdiqlənərsə Britaniya da İŞİD-ə qarşı əməliyyatlara qatılacaq. Britaniyanın baş naziri Devid Kemeron deyib ki, İŞİD-ə qarşı hərbi əməliyyatlar illərlə davam edə bilər. O, İŞİD-in Britaniya hökumətinə və Britaniya xalqına qarşı hücuma keçmək niyyətində olduğunu bildirib.

Son məlumatlara görə Danimarka da İŞİD-ə qarşı koalisiyaya qüvvələrinə qoşulacaq. Bununla əlaqədar əməliyyatlarda iştirak üçün Danimarka yeddi F-16 döyüş təyyarəsi göndərəcək.

Danimarkanın baş naziri Xelle Torninq-Şmidt hərbi maşınların və 250 nəfər uçuş və texniki heyətin göndərilməsi haqqında qəarar qəbul edildiyini bildirib. Missiyanın müddəti 12 ay müəyyən edilib. (anspress)

Ölkə.Az