Obama dünyaya mesaj verdi
BMT Baş Assambleyasının 69-cü iclasında çıxış edən ABŞ prezidenti Barak Obama önəmli mesajlar verib.
Rusiyanın Ukraynaya təcavüzünü pisləyən Obama bildirib ki, böyük dövlətlər kiçik ölkələrə təzyiq etməməlidir.
"Böyük və kiçik dövlətlər məsuliyyətlərimizi yerinə yetirməliyik. Hər xalqın və ölkənin güvənliyi BMT-nin zəmanəti altındadır. Rusiyanın təcavüzkarlığı bu qoyulan qaydalara qarşıdır. Krım ilhaq edildi. Ukrayna öz süverenliyini bərpa etmək istəyəndə Rusiya araya girdi. Biz dünyada gücün doğru olduğunu qəbul etmirik. Ukraynada artıq atəşkəs rejimi elan olunub. Rusiya bu atəşkəsə tövhəsini verdi. Əgər Rusiya belə davam etsə, sanksiyalar ləğv oluna bilər. Və əvvəlki illərdə olduğu kimi Rusiya ilə əməkdaşlıq edəcəyik", deyə Obama bildirib.
ABŞ prezidenti dünya üçün böyük təhlükəyə çevrilmiş Ebola epidemiyası barədə danışaraq ölkələri buna qarşı birgə mübarizəyə səsləyib.
İranın nüvə problemi ilə bağlı aparılan danışıqlara toxunan ABŞ prezidenti bunun rəsmi Tehran üçün bir fürsət olduğunu deyib.
Obama çıxışında İŞİD-ə qarşı həyata keçirilən hərbi əməliyyatlar barədə də danışıb. Qeyd edib ki, dünyanı terror qruplaşmaları təhdid edir:
"XXI əsrdə terror böyük bir problemdir. Dünyanın ən böyük dinlərindən birindən sui istifadə edirlər. Günahsız insanları öldürürlər. Mən açıq bir şəkildə söyləyirəm. ABŞ İslamla müharibə aparmır. İslam sülh dinidir. Müsəlmanlar şərəfli insanlardır. Amerikada dini ayrı-seçkilik yoxdur. Biz mədəniyyətlərin qarşıdurması fikrini rədd edirik. Bu dini fanatiklərin öhdəsindən gəlməliyik. "Əl-Qaidə"ni Əfqanıstanda məğlub etdik. Ancaq məzhəb qarşıdurmalarını nəzarət altına almaq çətinləşir.
Birinci növbədə İŞİD zəiflədilməli və məhv edilməlidir. Onların bildiyi tək dil gücdür. ABŞ geniş bir koalisiya ilə birgə İŞİD-in öhdəsindən gələcəkdir.
Dünyanın müsəlman ölkələri "Əl-Qaidə" və İŞİD kimi təşkilatları rədd etməlidir. Heç bir uşaq başqasına nifrət ruhunda böyüdülməməlidir. Hesab edirəm ki, bütün bunlar müasir təhsil öyrədilməklə yoluna qoyula bilər". (anspress)
Ölkə.Az
