Qəddafinin oğlu saxlanıldı

Hannibal barəsində həbs-qətimkan tədbiri seçilib

Ölkə.Az xəbər verir ki, Liviyanın keçmiş lideri Müəmmar Qəddafinin oğlu Hannibal Livanda saxlanılıb.

Bildirilir ki, dindirilmədən sonra məhkəmə Hannibal barəsində həbs-qətimkan tədbiri seçib.

Qeyd edək ki, Hannibal Qəddafi 1978-ci ildə Liviyada müəmmalı şəkildə itkin düşən şiə imamı Musa Sədr barədə məlumatı qəsdən gizlətməkdə təqsirli bilinir.

Bir neçə gün əvvəl isə Hannibal Qəddafi Livanda şiə qruplaşmaları tərəfindən oğurlanaraq təhlükəsizlik orqanlarına təhvil verilib. Mühacir həyatı yaşayan 40 yaşlı Hannibal Qəddafi livanlı model Alina Skaffla evlidir və zaman-zaman Beyrutda olur.

Xatırladaq ki, Müəmmar Qəddafi öən ilin fevral ayından Liviyada başlayan etirazların ardından bütün ölkəni bürüyən vətəndaş müharibəsi nəticəsində 2011-ci ilin oktyabr ayında öldürülmüşdü. O, 42 il idi ki, Liviyanı idarə edirdi.

Rəşid Mustafazadə

Ölkə.Az