Kanadada islamçılar pasportsuz qaldı

Suriyada döyüşən Kanada vətəndaşları pasportdan məhrum ediləcək

Ölkə.Az xəbər verir ki, Kanadanın rəsmi mənbələrinin yaydığı məlumata görə, hal-hazırda Suriyada döyüşən islamçılar arasında 30 nəfər Kanada vətəndaşıdır. Daha 130 kanadalı isə müxtəlif ölkələrdə yerləşən terror qruplaşmaları tərkibində fəaliyyət göstərirlər.

Rəsmi mənbələr bildirir ki, islamçıların hamısı yaxın zamanda pasportlardan məhrum olacaq. Bu məlumatı Kanadanın vətndaşlıq və emiqrasiya məsələləri üzrə naziri Kris Aleksandr "National Post" nəşrinə bildirib.

Aleksandrın sözlərinə görə, ekstremizmdə ittiham olunan bir neçə kanadalının pasportu artıq ləğv edilib. Bu şəxslər bundan sonra nə Kanadaya qayıda, nə də digər ölkələrdə Kanada vətəndaşı kimi hərəkət edə bilərlər.

"Biz istəyirik ki, Kanadanın təmiz adı bu insanlar tərəfindən ləkələnməsin və kanadalılar təhlükəsizlikdə olsunlar", - deyə nazir qeyd edib.

Rəşid Mustafazadə

Ölkə.Az