Ermənistanın puç olan arzusu

Qazaxıstanın xarici işlər naziri Rusiya və Ermənistana xəbərdarlıq edib ki, oktyabrın 10-da Minskdə keçiriləcək görüşə kimi Astananın xarici siyasət idarəsi Ermənistanın Avrasiya İqtisadi Birliyinə daxil olub-olmaması haqqında yekun nəticəyə gələ bilməyəcək.

Bu barədə "Aykakan Jamanak" qəzeti diplomatik mənbələrə istinadən yazır. Nəşrin yazdığına görə, Qazaxıstanın bu mövqeyi o deməkdir ki, Ermənistanın bu birliyə daxil olmaq cəhdləri yenə də boşa çıxacaq. İndi bununla bağlı Moskva ilə İrəvan arasında intensiv müzakirələr gedir.

Yəqin ki, buna görə müstəqillik gününə həsr edilən təntənəli mərasimdə çıxış edən Ermənistan prezidenti Serj Sarkisyan ölkəsinin Avrasiya İttifaqına daxil olmasının dəqiq tarixini açıqlamayıb.

O belə deyib: "Yaxın gələcəkdə biz bu İttifaqın üzvü olmağa hazırlaşırıq".

Rusiya həmişə Ermənistanın bu quruma daxil olmasının tərəfdarı olub. Qazaxıstan isə əvvəldən bu ölkənin Dağlıq Qarabağa görə Birliyə qoşulmasına razılıq verməyib.

Xatırladaq ki, bir müddət öncə Qazaxıstan prezidenti Nursultan Nazarbayev əgər bu və ya başqa məsələdə təzyiq ediləcəyi təqdirdə ölkəsinin hətta birlikdən çıxa biləcəyini də deyib. "Biz Avrasiya İqtisadi Birliyində tamamilə eynihüquqluyuq". (anspress)

Ölkə.Az