Cavad Heyət Amerikada anıldı

Amerikada yaşayan bir qrup soydaşımız Azərbaycanın böyük alimi Prof. Dr. Cavad Heyətin vəfatının 40-ci günü ərəfəsində onu yad edib.

Bu barədə Vaşinqtonda yaşayan soydaşımız, jurnalist Zaur Bayramlı məlumat verib. Amerikada yaşayan Güney Azərbaycanlı soydaşımız Həbib Azərsinanın aparıcılığı ilə keçirilən tədbirdə şair-yazar Məhəmməd Rza Levayi, Rza Selehşur, Cavad Abbasi, Zaur Bayramlı çıxışlarında Doktor Cavad Heyətin həyat və yaradıcılığından, “Varlıq” dərgisindən, Cavad Heyətin İrandakı rejiminin basqısı altında olsa belə, türk dilinin qorunmasındakı əvəzsiz fəaliyyətindən və digər xidmətlərindən bəhs ediblər. 

Eyni zamanda tədbirdə Güney Azərbaycan milli hərəkatının bugünkü durumu və gələcək fəaliyyəti ilə bağlı da fikir mübadiləsi aparılıb. Z.Bayramlının sözlərinə görə, Amerikada yaşayan quzeyli-güneyli Azərbaycan türklərinin fəaliyyətinin daha da gücləndirilməsi üçün qeyri-siyasi bir cəmiyyətə ehtiyac olduğu vurğulanıb və yaxın zamanda belə bir cəmiyyətin qurulması ilə bağlı razılığa gəlinib. (musavat)