Makedoniya adını dəyişməyə hazırdır

Makedoniyanın Baş naziri 15 ildən sonra ilk dəfə Yunanıstana rəsmi səfər edəcək

Ölkə.Az -ın xəbərinə əsasən, Makedoniyanın Baş naziri Nikola Qruevski bəyan edib ki, ölkəsi adının dəyişdirilməsi məsələsi barədə Yunanıstan ilə dialoqa hazırdır.

O, Yunanıstan ilə dialoqun baş tutduğu halda ölkədə referendumun təşkilinin mümkünlüyünü bildirib.

Xatırladaq ki, 24 ildir davam edən problem Makedoniyanın müstəqilliyini bəyan etməsindən sonra başlayıb. Yunanıstan Makedoniyanı ölkənin tarixi bölgəsi olan Makedoniyanın adını, Makedoniyalı İsgəndərin irsini, bayraqlarındakı günəş simvolunu mənimsəməkdə ittiham edir. Münaqişə Yunanıstanın Makedoniyanın NATO və Avropa İttifaqına daxil olmasına əngəl yaratması və BMT-nin Makedoniyanı – Keçmiş Yuqoslaviya Makedoniya Respublikası adlandırması ilə nəticələnib.

Dekabrın 17-də Makedoniyanın baş naziri 15 ildən sonra ilk dəfə Yunanıstana rəsmi səfər edəcək.

Makedoniya Respublikası Cənub-Şərqi Avropada, Balkan yarımadasında ölkə. Şimalda Serbiya, qərbdə Albaniya, cənubda Yunanıstan, şərqdə Bolqarıstan ilə qonşudur. Birləşmiş Millətlər Təşkilatı tərəfindən 1993-cü ildə müstəqil ölkə kimi tanınıb. Yunanıstanın təzyiqləri nəticəsində ölkənin adı BMT-də Keçmiş Yuqoslaviya Makedoniya Respublikası (FYROM) kimi qəbul edilib.

Rəşid Mustafazadə

Ölkə.Az