Bu gün onların günüdür
2000-ci ildən etibarən 18 dekabr – Beynəlxalq Miqrant Günü kimi qeyd olunur.
Ölkə.Az xəbər verir ki, bu barədə qərar 2000-ci il dekabrın 14-də BMT-nin Baş Assambleyası tərəfindən qəbul olunub.
Qeyd edək ki, 1990-cı il dekabrın 18-də BMT Baş Assambleyasında bütün miqrant işçilərin və onların ailə üzvlərinin hüquqlarının müdafiəsi üzrə Beynəlxalq Konvensiya qəbul edilib.
BMT-yə üzv dövlətlər, hökumətlərarası və qeyri-hökumət qurumları Beynəlxalq Miqrant Gününü qeyd etməyə və bu gündə miqrantların hüquq və azadlıqlarının müdafiəsi ilə bağlı geniş tədbirlər keçirməyə dəvət olunurlar.
2006-cı il dekabrın 14-15-də baş tutan BMT Baş Assambleyasının Beynəlxalq Miqrasiya və İnkişaf üzrə Yüksək səviyyəli Dialoquna 132 üzv dövlət qatılıb. İlk olaraq, iştirakçılar beynəlxalq miqrasiyanın böyüyən fenomen olduğunu və hüquqlar çərçivəsində onun ölkələr arasındakı əməkdaşlığa müsbət təsir göstərə biləcəyini vurğulayıblar.
2004-cü ildə Azərbaycan Respublikasının Dövlət Miqrasiya Siyasəti Konsepsiyası qəbul edilib. Bu konsepsiyada hökumət qurumları qarşısında miqrasiya proseslərinin tənzimlənməsi sahəsində duran məqsədlər müəyyən edilib. Dövlət Miqrasiya Siyasəti Konsepsiyasından irəli gələn məsələlərin həyata keçirilməsi üçün 2006-cı il iyulun 25-də Prezident İlham Əliyevin Sərəncamı ilə “Azərbaycan Respublikasının 2006-2008-ci illər üçün Dövlət Miqrasiya Proqramı” təsdiq edilib.
Miqrasiya sahəsində dövlət siyasətini, miqrasiya proseslərinin idarə edilməsi və tənzimlənməsində Azərbaycan Respublikasının qanunvericiliyi ilə müəyyən edilmiş səlahiyyətləri həyata keçirmək məqsədilə Prezidentin 19 mart 2007-ci il tarixli Fərmanı ilə Azərbaycan Respublikası Dövlət Miqrasiya Xidməti yaradılıb və Əsasnaməsi təsdiq edilib.
Dövlət Miqrasiya Xidmətinin fəaliyyətinə miqrasiya proseslərinin təhlili, proqnozlaşdırılması və monitorinqin təşkil edilməsi, miqrasiya sahəsində vahid informasiya sisteminin yaradılması, miqrasiya sahəsində beynəlxalq əməkdaşlığın inkişaf etdirilməsi, əcnəbi və vətəndaşlığı olmayan şəxslərə müvəqqəti və daimi yaşamaq üçün icazənin verilməsi və s. məsələlər daxildir.
Ölkə.Az
