Paris terroru ilə bağlı iki qardaş saxlanıldı

Onların əsas hədəfi Paris terrorunun təxmin edilən təşkilatçısı Salah Abdeslam olub

Ölkə.Az xəbər verir ki, Brüssel polisi mərkəzi küçələrdən birində aparılan xüsusi əməliyyat zamanı Paris terrorunda şübhəli bilinən iki qardaşı saxlayıb.

RTBF televiziya kanalının məlumatına görə, saxlanılan iki nəfər doğma qardaşlardır. Hazırda onlar məsələnin araşdırılması üçün yerli polis şöbəsinə çatdırılıb. Xüsusi əməliyyat şəhərin binalarından birində aparılıb. Bununla bağlı sakinlər təcili təxliyə edilib. Polisin bütün fəaliyyəti Parisdəki terror aktı ilə bağlılığı olan ekstremistlərin axtarılmasına yönəlib.

Qeyd olunur ki, hüquq-mühafizə orqanlarının əsas hədəfi Paris terrorunun təxmin edilən təşkilatçısı Salah Abdeslam olub.

Xatırladaq ki, 13 noyabrda Parisdə terror aktları zamanı 130 nəfər dünyasını dəyişib.

Rəşid Mustafazadə

Ölkə.Az