Rusiyalı oliqarx: \"Məni də Telman kimi soyacaqlar\"

Rusiyanın ən iri ticarət şirkətlərindən biri olan JFC-nin sahibi Vladimir Kexman rəsmən müflis elan olunub.

Ölkə.az xəbər verir ki, Rusiyaya gətirilən tropik meyvələrin idxal inhisarçılarından biri kimi tanınan JFC-nin rəhbəri şirkətinin iflasından danışıb.

Onun sözlərinə görə, iflasın səbəbi Rusiyada onun işlədiyi banklardır.

"Devalvasiyadan sonra banklar şərtlərini ağırlaşdırdı. Şirkət normal işləyir, gəlir gətirirdi. Amma banklar mənə müharibə elan etdilər. Nəticəsində şirkətin işi dayandı. 2015-ci ildə JFC qrupunun ümumi borcu 18 milyard rubl idi. Bu borcun böyük bir hissəsi, 6,1 milyardı Sberbanka, 4,5 milyard rublu Moskva Bankına, geridə qalanları isə digər banklara idi. Dekabr ayının ortalarına qədər şirkət borcunun 500 milyonunu ödədi, amma böhran ödənişi davam etdirməyə imkan vermədi. Əgər gələcəkdə hər şey Sberbankın ssenarisi üzrə gedəcəksə, onda biz borcumuzu ümumiyyətlə verə bilməyəcəyik və Telman İsmayılovun aqibəti bizi də gözləyəcək. German Qref onu necə soydusa, bizi də eləcə soyacaq. Hazırda JFC-nin mülkiyyətinin əsas kreditor olan Sberbank tərəfindən müsadirəsi davam edir. 5 000 hektar torpağımız, Rusiyanın 6 böyük şəhərindəki nəhəng ambarlarımız, içində də mal, müsadirə olunub", deyə Vladimir Kexman bildirib.

Xatırladırıq ki, dekabr ayının 21-də azərbaycanlı oliqarx Moskva arbitraj məhkəməsi tərəfindən müflis elan olunmuş və onun Rusiyadakı bütün əmlakı banklara olan borcu müqabilində müsadirə edilmişdi.

Ölkə.az