Atambayevdən Ərdoğana məsləhət: \"Rusiyadan üzr istəməlidir\"

"Türkiyənin Rusiyaya məxsus Su-24 təyyarəsini vurma qərarı səhv idi. Ankara üzr istəməlidir".

Ölkə.Az xəbər verir ki, bunu Qırğızıstan prezidenti Almazbek Atambayev bəyan edib.

"Biz dərhal bəyan etdik ki, Türkiyə bu cür radikal tədbirlərə əl atmamalı idi. Bu, faciəvi səhv idi və həm türk, həm rus xalqı üçün bəladır. Biz bu barədə Putinlə danışmışdıq, mən fikirlərimi Ərdoğanla görüşdə də dedim. Hətta təyyarə Türkiyənin ərazisinə 17 saniyəlik daxil olsa da, 20 il boyu qurulan qarşılıqlı münasibətlərə 17 saniyə ərzində zərbə vurmaq olmaz. Bizdə elə hallar olub ki, qonşu ölkənin təyyarəsi nəinki saniyə, saatlarla hava məkanımızı pozub. Amma biz onu vurmamışıq. Bizim üçün sülh önəmlidir", - deyə Atambayev bildirib.

Dövlət başçısının fikrincə, iki ölkə arasında gərginliyin artması hər iki tərəfə həm iqtisadi, həm siyasi baxımdan sərfəli deyil.

"Düşünürəm ki, Türkiyə Rusiyadan üzr istəməlidir", - deyə prezident qeyd edib.

Xatırladaq ki, noyabrın 24-də səhər saatlarında Rusiyanın Suriyadakı hərbi aviasiya qrupuna məxsus "Su-24" döyüş təyyarəsi Türkiyənin hava sərhədini pozub. Türkiyə Hərbi Hava Qüvvələri ərazini tərk etmələri üçün ruslara 10 dəfə xəbərdarlıq edib. Bundan sonra Türkiyənin "F-16" qırıcıları "Su-24"ü zərərsizləşdirib.

Rəşid Mustafazadə

Ölkə.Az