İranın neft naziri: \"Neft ixracını artıracağıq\"

"Bizim üçün neft ixracını sanksiyalardan əvvəlki vəziyyətə qaytarmaq prioritet məsələdir".

Ölkə.Az xəbər verir ki, bunu İranın neft naziri Bican Nəmdər Zəngənə bəyan edib.

KİV-lərdə İranın bu məqsədə nail olması üçün karbohidrogenləri olduqca cəlbedici şərtlərlə satması və bununla neft idxalçılarını maraqlandırması barədə xəbərlər yayılıb. Zəngənə buna da münasibətini bildirib.

"Məhdudiyyətlərin aradan qaldırılmasından sonra bizim üçün neft ixracını sanksiyalardan əvvəlki vəziyyətə qaytarmaq prioritet məsələdir. Sanksiyaların ləğvindən sonra bizim endirimlər bazar normaları çərçivəsində olacaq", - deyə Zəngənə qeyd edib.

Xatırladaq ki, İran ilə "5 + 1 qrupu" arasında İsveçrənin Lozanna şəhərində keçirilən nüvə müzakirələrində aprel ayının ikisində ilkin razılıq əldə edilmişdi.

Rəşid Mustafazadə

Ölkə.Az