Ərdoğan: \"Türkiyə-Rusiya münasibətləri tamamilə kəsilməyib\"

"Biz düşmənlər yox, dostlar qazanmaq istəyirik"

Ölkə.Az-ın xəbərinə əsasən, Türkiyə prezidenti Rəcəb Tayyıb Ərdoğan "Al Arabia"ya müsahibəsində bəyan edib ki, Türkiyə və Rusiya Federasiyası arasında münasibətlər müxtəlif sahələrdə davam edir.

O, hər iki ölkənin xarici işlər nazirlərinin görüşlərinin davam edəcəyinə ümidini ifadə edib.

"Türkiyə-Rusiya münasibətləri tamamilə kəsilməyib. Mən həmişə demişəm ki, ölkələrimiz diplomatik münasibətləri kəsməməlidir. Rusiya ilə münasibətlər energetika, qida ərzaqları, ikitərəfli ticarət kimi sahələrdə davam edir. Rusiya ilə münasibətlərimizə gəlincə, biz onların neqativ istiqamətə getməsini arzu etmirik. Biz bundan uzaqlaşaraq münasibətlərimizi diplomatiya çərçivəsində qurmaq istəyirik", - deyə Ərdoğan qeyd edib.

Türkiyə prezidenti xarici işlər nazirlərinin Belqrad görüşündən danışıb.

"Türkiyənin xarici işlər naziri rusiyalı həmkarı ilə görüşüb. Görüş pozitiv ab-havada keçib. Ümid edirəm ki, bu görüşlər davamlı olacaq. Bəzi dövlətlər bu gərginliyin davam etməsini arzu edir. Həm də dost ölkələrin Rusiya-Türkiyə münasibətlərinin yaxşılaşması üçün səyləri var. Biz düşmənlər yox, dostlar qazanmaq istəyirik", - deyə prezident əlavə edib.

Xatırladaq ki, noyabrın 24-də Türkiyə Hərbi Hava Qüvvələrinin qırıcısı Suriya ilə sərhəddə Rusiyaya məxsus bombardmançı təyyarəni vurub. Türkiyə tərəfi Su-24 təyyarəsinin sərhədi pozduğuna görə vurulduğunu bəyan edib.

Rusiya tərəfi isə təyyarənin Suriya ərazisində vurulduğunu iddia edir.

Rəşid Mustafazadə

Ölkə.Az