Kiyevdə deputatı zibil qutusuna atdılar

Ukraynanın şərqindəki Donetsk şəhərində Çex Respublikası və Polşanın konsulluq binaları separatçılar tərəfindən tutulub.

Bu barədə Ukrayna Milli Təhlükəsizlik və Müdafiə Şurasının sözçüsü Andrey Lisenko açıqlama verib.

Qeyd edək ki, Donetskdəki Polşa və Çex Respublikası konsulluqları 12 iyuldan fəaliyyətlərini dayandırmışdı. Həmçinin Donetsk bölgəsi ticarət məhkəməsi də iyul ayının əvvəlindən qarşıdurmalar səbəbindən bağlanmışdı. Ticarət məhkəməsini ələ keçirən separatçılar binaya özlərinin elan etdiyi "Donetsk Xalq Respublikası"nın Kənd Təsərrüfatı Nazirliyini yerləşdiriblər.

Kiyevdə isə vəziyyət yenidən gərginləşib.

Avropa Birliyi (AB) ilə tərəfdaşlıq müqaviləsinin təsdiq edən parlament binası qarşısında köhnə hökumət üzvlərinin cəzalandırılmasını nəzərdə tutan qanunun qəbul edilməsi tələbi ilə keçirilən nümayişdə Regionlar Partiyasından millət vəkili olan Vitali Jurabski zibil qutusuna atılıb. Yanukoviç dövründə bir sıra mübahisəli qanunlara müəlliflik edən deputata bir müddət zibili qutusundan çxmağa imkan verilməyib.

Parlament binası qarşısında toplanan radikal fikirli "Sağ Sektor" üzvləri və millətçilər ölkənin şərqindəki bəzi vilayətlərə xüsusi status verilməsini nəzərdə tutan qanunun məzmunun açıqlanmasını da tələb edirlər.

Siyasi müşahidəçilər Ukraynada növbəti hakimiyyət dəyişikliyini istisna etmirlər. Belə ki, Pyotr Poroşenko hakimiyyətinin Rusiyanın dəstəklədiyi separatçıların tələblərinin bir qisminə razılaşması Ukrayna millətçilərini razı salmayıb və bu gündən Kiyevdə kütləvi nümayişlərə start verilib. (anspress)

Ölkə.Az