Putin \"Taliban\" lideri ilə görüşüb

"The Sunday Times" Putinlə "Taliban" liderinin görüşündən xəbər tutub

Ölkə.Az-ın xəbərinə əsasən, Böyük Britaniyanın nüfuzlu "The Sunday Times" qəzeti "Taliban" hərəkatındakı mənbələrinə istinadən xəbər yayıb ki, Rusiya Federasiyası prezidenti Vladimir Putin sözügedən təşkilatın lideri Əhtar Mənsurlə görüşərək dəstək verəcəyini vəd edib.

Bütün iddialar Kreml tərəfindən təkzib edilib.

Qəzet yazır ki, Putin sentyabr ayında "Taliban" lideri ilə Tacikistandakı hərbi bazada görüşüb. Bunu "The Sunday Times"a həmin danışıqlarda iştirak etmiş səhra komandirlərindən biri danışıb.

Mənbənin sözlərinə görə, Mənsur Rusiya tərəfindən mümkün olan dəstəyi müzakirə etmək istəyib. Putin isə taliblərə müasir rus silahları və Moskvanın maraqlarına xidmət edən əməkdaşlıq müqabilində maliyyə yardımı vəd edib.

Qəzetin mənbəsi qeyd edib ki, Rusiya prezidenti hələ sovet ordusu ilə döyüşən İslam partiyasının rəhbəri Gülbəddin Hikmətiyar və keçmiş əfqan mücahidlərinə qarşı hücumları gücləndirməsində təkid edib.

"Taliban"ın daha iki səhra komandiri "The Sunday Times"a bəyan edib ki, Kabilə təzyiq edə bilmək üçün əfqan hökumətinə qarşı taliblərin fəaliyyətinə dəstək verir.

Xatırladaq ki, 2014-cü ildə ABŞ rəhbərliyi altında olan 130 minlik NATO qoşunları Əfqanistandan çıxarılıb. Ağ Ev 2015-2016-cı illər ərzində əfqan hökumətinə "Taliban"la mübarizə aparmaq üçün 10 minlik amerika kontingentini saxlamağa izn verib.

Rəşid Mustafazadə

Ölkə.Az