Əhməd Davudoğlu: Belə vəziyyətdə hər iki ölkəyə zərər dəyir

Rusiyanın tətbiq etdiyi məhdudiyyətlər Türkiyə iqtisadiyyatına demək olar ki, mənfi təsir göstərməyib, perspektivdə isə bu hər iki ölkəyə zərər vuracaq.
 
Ölkə.Az xəbər verir ki, bu barədə Türkiyənin baş naziri Əhməd Davudoğlu NTV kanalına müsahibəsində deyib.
 
“Əgər təyyarə insidentindən sonra rus rublunun və türk lirəsinin tənəzzülünü, həmçinin bu böhranın hər iki ölkənin iqtisadiyyatına təsirini müqayisə etsək, biz mənfi nəticələrlə üzləşməmişik. Biz turizm və aqrar sektorlarının müdafiəsinə yönələn müvafiq tədbirlər həyata keçirmişik, sahibkarlara yardım göstəririk, yeni bazarlara üz tuturuq. O ki qaldı embarqoya, Rusiya vaxtilə Avropa İttifaqının sanksiyalarından gileylənirdi, indi isə özü eyni addım atır. Belə vəziyyətdə hər iki ölkəyə zərər dəyir”, deyə Ə.Davudoğlu bildirib. (APA)

Ölkə.Az