ABŞ-ın gizli sənədi üzə çıxdı

ABŞ-ın Suriya problemi haqda hazırladığı yeni hesabatın bəzi detalları mətbuata sızıb.

Ölkə.az xəbər verir ki, "Associated Press" agentliyinə etibarlı mənbədən ABŞ rəsmiləri üçün hazırlanmış bir gizli sənədin surəti daxil olub.

Həmin sənəddə Suriya prezidenti Bəşər Əsədin 2017-ci ilin mart ayında hakimiyyətdən gedəcəyi haqda məlumat yer alıb.

Xatırladırıq ki, bu tarixdə, yəni 2017-ci ilin mart ayında ABŞ prezidenti Barak Obamanın Bəşər Əsədin hakimiyyətdən getməsinin zəruriliyi haqda verdiyi ilk açıqlamadan düz 5 il keçəcək.

Sənəddə Əsədin hakimiyyətdən getməsi üçün göstərilən tarix isə əslində BMT Təhlükəsizlik Şurasının keçən ay qəbul etdiyi Suriyada sülhün bərqərar olması planına dayanır. Çünki bu plana əsasən 2017-ci ilin martında Suriyada yenidən prezident və parlament seçkilərinin keçirilməsi nəzərdə tutulur və Şuranın bütün üzvləri tərəfindən bu plan yekdilliklə qəbul edilib.

Ölkə.az