Gürcü politoloq: \"Kreml Gürcüstana qarşı hərbi təxribat hazırlayır\"

"Rusiya Gürcüstana qarşı növbəti hərbi təxribat hazırlayır"

Ölkə.az xəbər verir ki, bu fikirləri gürcü politoloq Qoça Qvaramia səsləndirib.

Gürcüstan KİV-lərinə verdiyi açıqlamada gürcü politoloq bildirib ki, abxaz və osetin separatçılarından başqa Rusiya indi də İŞİD vasitəsi ilə ölkəsinə qarşı silahlı təxribat hazırlayır.

"Heç kəs üçün sirr deyil ki, dünyada separatizmi və terrorçuluğu kim dəstəkləyir. İŞİD terror təşkilatı bu gün ən vahiməli terror şəbəkəsi kimi həmin qüvvələr tərəfindən dəstəklənir. Öz ərazisində İŞİD-in fəaliyyətini qadağan edən Rusiya başqa ölkələrdə bu təşkilatdan çox aktiv istifadə edir. Parisdə baş verən son terror olayları buna əsl sübutdur. Bu gün Rusiyanın ən çox qarışdırmaq istədiyi bir ölkə kimi Gürcüstan terrorun hədəfindədir. İpək Yolunun yenidən canlanması, beynəlxalq yük daşımalar üçün yeni marşurutun Rusiyadan yan keçməsi Kremli dəliyə döndərib. Bu layihənin reallaşmasına mane olmaq üçün isə Rusiyanın əlində heç bir əsas yoxdur. Ona görə də Moskva alternativ yola, terror təşkilatlarının və separatçı qrupların köməyi ilə bölgəni qarışdırmaq yoluna üstünlük verəcək", deyə Qoça Qvaramia bildirib.

Xatırladırıq ki, SSRİ dağıldıqdan sonra Rusiya Gürcüstanın iki regionunu, Abxaziya və Cənubi Osetiyanı faktiki olaraq işğal edib və Tiflisin nəzarətindən tam olaraq çıxarıb. 2008-ci ildə Osetiyada baş vermiş qısa müharibədən sonra isə Rusiya Abxaziya və Cənubi Osetiyanı rəsmən dövlət kimi tanıyıb.

Ölkə.az