Almaniyada miqrantlara hücumlar başladı

Yeni il gecəsi Köln şəhərində baş vermiş skandaldan və ətrafında yaranmış ajiotajdan sonra Almaniyada miqrantlara qarşı hücumlar başlayıb.

Ölkə.az xəbər verir ki, roker qrupları, futbol fanatları və nasist gənclər miqrantlara hücuma başlayıblar.

Bu haqda artıq sosial şəbəkələrdə çoxminli qruplar yaradılıb və almanları miqrantlara hücuma çağırırlar. Dünən gecə Kölnün rayonlarından birində 6 pakistanlı naməlum şəxslərin hücumuna məruz qalıblar. Daha sonra 39 yaşlı suriyalı miqrant Kölnün başqa bir rayonunda döyülüb.

Hələlik polisdə hadisəni hansı qruplaşmanın törətdiyi haqda heç bir məlumat yoxdur. Faktı Köln polisi araşdırır.

Xatırladırıq ki, Yeni il gecəsi Kölnün mərkəzi meydanından çəkilmiş kadrlarda Yaxın Şərq və Şimali Afrikadan gəlmiş miqrantların xuliqanlıq etdikləri, yerli qadınlara sataşdıqları bütün dünyada geniş rezonans doğurmuşdu.

Ölkə.az