Rusiyada smartfonlar 10-20 faiz bahalaşacaq

Smartfon istehsalçıları və pərakəndə satış şəbəkələri Rusiyada rublun yenidən düşməsi səbəbindən smartfonların satış qiymətinin artacağı barədə xəbərdarlıq edir.

Ölkə.Az-ın İKT.lent.az-a istinadən məlumatına görə, tezliklə mobil cihazlar 10-20 faiz bahalaşacaq.

“Kommersant” “VımpelKom”un nümayəndəsi Anna Aybaşevaya istinadən bildirir ki, operator artıq bir sıra satıcı şirkətlərdən smartfonların satış qiymətinin artacağı ilə bildirişlər alıb. A. Aybaşeva deyib ki, şirkət hələlik öz qiymət siyahısına dəyişiklik etmir və qiymətləri olduğu kimi saxlamağa çalışır.

Rusiyanın “M Video” və “Yevroset” kimi iri pərakəndə satış şəbəkələrində isə istehsalçılardan belə bir məlumat almayıblar.

“Samsung Mobile” şirkətinin Rusiyadakı rəhbəri Arkadi Qrafın sözlərinə görə, yaxın zamanlarda bütün Rusiya bazarında smartfonların qiyməti 15-20 faiz artacaq. “Samsung” bir sıra modellərində qiymətlərin 5-10 faiz artırılması məsələsinə baxır. Bu modellərin qiyməti isə valyuta məzənnəsindən asılı olaraq artıq yanvar ayında arta bilər.

“Sony Mobile” şirkətinin Rusiyadakı baş direktoru Aleksey Yermakov da tezliklə smartfonların qiymətinin artacağını gözləyir: “Biz gördük ki, riteylerlər Yeni il bayramı ərəfəsində alıcı cəlb etmək üçün müxtəlif əlavə endirimlər təklif etdilər. Bu aksiyaların dayandırılacağını və qiymətlərin artacağını gözləyirik”.

“Lenovo” şirkətinin Rusiyadakı mobil bölməsinin rəhbəri Anton Şveynov isə hesab edir ki, rubl dollara nisbətdə məzənnəsini 70 rubl səviyyəsində saxlasa, Rusiyada smartfonların qiyməti bu ilin yanvar-mart ayları ərzində 15-20 faiz bahalaşacaq.

“Svyaznoy” şirkətində isə razılaşırlar ki, bugünkü valyuta bazarındakı vəziyyətdə Rusiyada elektronika məhsullarının qiymətinin artması qaçılmazdır. Riteyler yaxın zamanlarda məhsulun modeli və istehsalçısından asılı olaraq qiymətlərin 10-30 faiz artmasını qaçılmaz sayır.

Ölkə.Az