Atəşkəs istəməmişik, bir daha təkrarlanmamalıdır - Əraqçi

Ölkə.Az-ın İranın SNN agentliyinə istinadən məlumatına görə, bunu İranın xarici işlər naziri Abbas Əraqçi jurnalistlərlə söhbətində deyib.

Nazirin sözlərinə görə, İran “ağır bir il” yaşayıb, lakin ölkə bu dövrü “qürur, ləyaqət və şərəflə” geridə qoyub.

“Bizdən qeyd-şərtsiz kapitulyasiya tələb edən Amerika indi Hörmüz boğazını açmaq üçün başqa ölkələrə müraciət edir”, – deyə o bildirib.

İran XİN rəhbəri Hörmüz boğazı ətrafındakı vəziyyətə də münasibət bildirib. Onun sözlərinə görə, əvvəllər İranın kapitulyasiyasını tələb edən ABŞ indi boğazda gəmiçiliyin təhlükəsizliyinin təmin olunması üçün digər dövlətlərdən kömək istəyir. Bununla yanaşı, o vurğulayıb ki, Tehranın mövqeyinə görə boğaz açıqdır, lakin İranın özünə qarşı saydığı tərəflər istisna olmaqla.

“Biz dəfələrlə demişik və dünən Amerika telekanallarından birinə müsahibəmdə də təkrar etmişəm: biz heç bir mesaj göndərməmişik və atəşkəs istəmirik. Amma bu müharibə elə başa çatmalıdır ki, bir daha təkrarlanmasın”, – deyə o bildirib.

Əraqçi əlavə edib ki, İran “ləyaqətli müqaviməti” davam etdirəcək və müharibənin uzanmasını istəmir. Lakin o hesab edir ki, münaqişə gələcəkdə belə hücumların təkrarlanmasına imkan verməyəcək şəkildə başa çatmalıdır.

Onun sözlərinə görə, İran xalqı ölkəni müdafiə etməyə və lazım gələrsə qarşıdurmanı davam etdirməyə hazırdır.

“Məncə, onlar artıq yaxşı dərs alıblar və başa düşüblər ki, hansı xalqla üz-üzədirlər – özünü müdafiə etməkdə tərəddüd etməyən və lazım gələrsə müharibəni harada olursa-olsun davam etdirməyə hazır olan bir xalqla”, – deyə o sözlərini yekunlaşdırıb.